拜仁慕尼黑作客對奧格斯堡，拜仁只要贏波就可以提早奪標，成為德甲史上首支6連霸球隊。
呢場德甲第28輪重頭戲，奧格斯堡主場同拜仁合演巴伐利亞打吡戰，今場波對拜仁意義重大，只要全取3分，就可以提前5輪奪得冠軍，仲會成為史上首支6連霸球隊，對於老帥軒歷基斯亦同樣意義重大，今場將會係佢包括球員同教練生涯嘅第1,033場德甲比賽，追平「奧圖大帝」利赫高保持嘅紀錄。拜仁下周中歐聯8強次回合會喺主場再鬥西維爾，不過軒帥輪換得法，過去兩次歐聯前嘅德甲，拜仁都以6球大炒對手，根本唔使刻意留力。拜仁啱啱至破紀錄咁有6名球員入選上輪聯賽最佳11人，狀態火熱，今場雖有紐亞、阿拉巴、京士利高文同維達爾養傷，軒帥亦準備畀曉姆斯、湯馬士梅拿同列貝利等主力輪休，但前線火力依然強勁，最煞食當然係波蘭鋒霸羅拔利雲度夫斯基，呢位超級射手歷來係奧格斯堡剋星，至今已經入過奧堡18球，包括近4次對賽合共轟入9球，靠佢一人之力幾乎已經足夠開出大盤。
巴伐利亞打吡勢演入球騷
奧格斯堡護級壓力唔大，雖然近績一般，而且防線嚴重缺人，守將奇雲丹素、基利安積及同拉菲爾費貝加養傷，丹尼爾奧柏尼因紀律問題被內部停賽，不過好消息係來自冰島嘅首席射手艾費特芬保加臣終於傷愈復出，前線多咗呢位柱躉式中鋒，拍住近況甚佳嘅基哥列舒治攻堅，喺主場有力攻破唔齊人嘅拜仁防線，今場打吡戰大細中位數2.5球有1.65倍，係穩陣過關之選。
分享到：