周五凌晨歐霸8強次回合，莫斯科中央陸軍將會返到主場再鬥阿仙奴。兵工廠近排歐霸客戰踢法都較為保守，尤其阿仙奴首回合4比1贏波，呢場肯定唔會急住同對手鬥攻，而且中央陸軍歐霸主場攻力麻麻，兩隊都唔似會添加入球紀錄，度士我實捧和波。
（Now 633周五凌晨3時05分直播）
莫斯科中央陸軍呢班波質素實在一般，尤其歐戰逢親面對歐洲豪門球隊，都好難攞到着數，歐霸近4仗主場出擊，都只係入到1球，可見攻力認真唔算標青，面對歐戰經驗豐富，而且實力明顯佔優嘅兵工廠，想反勝邊有咁易？相反阿仙奴8強首回合以4比1大勝中央陸軍，可以話已穩奪4強入場券，不過即使大比數領先，為免重演早前歐聯8強次回合巴塞隆拿被反超遭淘汰嘅悲劇，相信作客嘅兵工廠都會吸取教訓不敢怠慢，呢場肯定全力做好防守，唔會畀中央陸軍有機可乘。
強敵環伺捧盃有懸念
阿仙奴英超畀4哥熱刺遠遠拋離，聯賽歐聯席位已經冇得爭，下季想踢歐聯惟有全力爭歐霸冠軍，不過兵工廠就算成功闖入4強，都好有機會面對馬德里體育會等強敵，尤其英超球隊面對西甲球隊不嬲冇咩着數，所以阿仙奴有冇機會捧盃，都係未知之數，與其擔心未來，不如專心面對眼前挑戰好過。
分享到：