今屆澳職常規賽得番最後兩輪，形勢非常緊張，今日排第3嘅墨爾本城會主場出擊，迎戰已經無欲無求、打埋呢兩場就收咧放假嘅中岸水手。相比之下，將會打季後賽嘅墨爾本城就梗係要保持住爭勝戰意啦，所以唔使講，一定全力撐行墨爾本城，要讓球主勝。（有線603及604台周六下午5時50分直播）
墨爾本城現時得40分，雖然已經冇機會追上有47分、排第2嘅紐卡素噴射機，但依家最緊要保住第3位，以防後面嘅墨爾本勝利同埋阿德萊德聯從後趕上，搶走季後賽有得踢主場嘅優勢，因此鬥志絕對唔需要懷疑。墨城今日完全冇任何傷停問題，甚至連翼鋒布魯士卡馬奧同防中奧沙麥馬歷都可以納入大軍名單，依家連後備兵源都出現人滿之患，始終都係個「開心的難題」（Happy Problem）。佢哋近3場比賽不敗，證明到咗季尾階段依然決心十足，有理由相信，佢哋今日攞走3分冇走雞。
中岸水手零士氣等放假
至於作客嘅中岸水手依家排緊聯賽尾二，全隊上下嘅心思可能已經飛咗去之後嘅悠長假期咯。今日更加冇埋防守球員安東尼哥歷，同埋中前場主力丹尼爾達施華，因此就算個別球員想搏，始終唔夠成隊有共同目標咁有力啦，加埋球會早前炒咗教練奧干，軍心大亂，依家可以話零士氣，睇嚟今日作客，應該都係做炮灰居多。
溫馨提示各位「占仔記」嘅老友記，我哋有線球彩台同高清台已經搬家，依家捧場，個遙控器就要撳去604（球彩台）同603（代替原有高清203）喇！大家留意呀，到時我好大機會有臨場好嘢送畀大家呢！
分享到：