周四凌晨歐聯8強次回合兩場好波，首回合已經取得領先優勢嘅兩支球隊，次回合齊齊返到主場，出線機會明顯高唱入雲，等我嚟講講點解。
作客挑戰皇家馬德里嘅祖雲達斯，今季聯賽好大機會再封王，縱使個人認為意甲「二哥」拿玻里今季表現更標青，仲喺聯賽榜一度超越祖記，不過「老婦人」喺意甲依然超班，只可惜佢哋去到歐聯就總係差啲。
相反坐鎮主場嘅皇馬，呢場後防其實有少少隱憂，除咗隊長沙治奧拉莫斯停賽之外，拿祖費南迪斯都有傷或倦勤，主帥施丹手上剩低華拉尼同捷西斯華利祖兩位中堅可用，前者上仗馬德里打吡踢足90分鐘體力會輸蝕，後者年紀同經驗都欠奉，呢場大戰排佢上陣都未必穩陣，好在皇馬有主場之利，加上首回合贏夠3球分差實在太大，呢場可以慢慢睇定嚟食，祖記想翻身真係談何容易，今仗路數咁難捉，投注人士都要小心為上。
另一場拜仁慕尼黑主場對西維爾，拜仁今季聯賽亦曾經出現暗湧，不過72歲高齡老帥軒歷基斯接手後，用咗唔夠1季時間，拜仁聯賽冠軍獎盃已經落袋，嚟緊仲有機會問鼎德國盃同歐聯，尤其遭雪藏多時嘅西班牙中場查維馬天尼斯，獲老帥重用後表現大勇，足證軒歷基斯調兵遣將嘅功架，今仗就算再遇西維爾呢舊豬頭骨，拜仁帶住首回合2比1優勢兼有主場之利，我相信佢哋依然可以大步檻過成功晉級。唯獨今仗捧拜仁水位唔吸引，寧願留番本錢，到4強再博邊隊更有冠軍相好過。
金句：今晚歐聯有暗湧？睇真原來係潮退
分享到：