哥帥玩「佛系」 緣分到了就捧盃
今晚英超上演曼市打吡戰，曼城主場對曼聯，若曼城今仗贏波即提前封王，不過場波卻來得唔多合時，因為咁啱夾喺2場歐聯8強生死戰中間，搏得太盡隨時有反效果，哥迪奧拿今場惟有採取「佛系教波法」、不出主力、不太落力，緣分到了，聯賽冠軍自然手到拿來，樂比推介曼聯受讓半一嘅下盤。（Now 621周日凌晨零時30分直播）
「佛系」改圖近期紅爆網絡，呢種看破紅塵，不問世事嘅生活態度，正好適合大師級嘅哥迪奧拿今場應用，畢竟聯賽已拋離第2位嘅曼聯多達16分，聯賽冠軍只係朝夕之事，當務之急最緊要係歐聯晉級。
要留力歐聯打翻身戰
睇番曼城3日前歐聯8強首回合嘅表現可用災難嚟形容，慘吞利物浦3蛋嘅戰果固然肉酸，後防亦太多甩漏，由於3日後就要打次回合賽事，曼城想翻身，聯賽自然要留一手，唔好話驚班球員搏得太盡有咩受傷或消耗體力，如果真係咁「唔好彩」贏波提前封王，咁你叫班球員慶唔慶祝好？須知道班後生仔血氣方剛，難以抗拒酒色財氣，就算班球員真係非常專業唔偷偷地慶祝住，影相鋪文呃Like在所難免，球員嘅專注度肯定有影響，畢竟過往捧完盃後腳軟嘅例子實在太多，如果哥帥深謀遠慮嘅話，肯定唔介意將捧盃日期壓後，既可keep住班球員團火，亦唔怕球員心散。
曼聯下盤全球性升溫
事實上，曼聯下盤嘅水位早喺幾日前已全球性大幅下挫，早喺星期一時，喺英國仲有曼聯受讓一球八水，但依家已得番受讓半一七幾水，全球博彩公司客W參考中位數由5.42下挫至4.03倍，證明大戶早已睇通呢點，連日來不斷瘋狂掃貨。
曼聯領隊莫連奴當然亦唔希望親自見證曼城捧盃，尤其係曼聯首循環以1比2不敵曼城，41場主場不敗紀錄被破，據聞仲喺返回更衣室時發生衝突，呢個仇點都要報，既然有利物浦大勝作為參考，莫帥有辦睇話唔定威番次。
分享到：