噬紅軍複製巴塞奇迹
歐聯8強次回合重頭戲嘅英超內訌，「藍月亮」曼城主場再鬥利物浦，首回合曼城作客慘吞3蛋，今仗返主場要盡地一煲拚死狂攻，務求重演今季聯賽首循環5比0大炒紅軍嘅好戲。不過利物浦向來遇強愈強，對手狂攻啱晒紅軍班反擊狂人胃口，兩隊火力十足，博中位數3.5球入球大冇甩拖。
（有線602、603、604、662台周三凌晨2時45分直播）
利物浦歐聯作客喪入波
曼城首回合作客利物浦除咗慘敗0比3，全場射門更錄得零中目標，戰況可以話一面倒，不過有上屆巴塞隆拿16強先輸4球，照樣反勝巴黎聖日耳門晉級嘅先例，相信冇人敢斷言曼城全無機會。今季英超首循環碰頭，曼城就曾經喺主場大勝利物浦5比0，所以「藍月亮」今仗肯定唔會放棄。
事實上，曼城係今季英超主場入波最多球隊，16仗主場共轟53球，平均每仗入多過3球，進攻三叉戟奇雲迪布尼、加比爾捷西斯同阿古路喺上仗聯賽都只係後備上陣，擺明為今仗絕地反擊做準備。不過，曼城連續2場比賽都失3球，防守上有一定漏洞，可能係佢哋製造奇迹最大隱憂。
利物浦依家形勢大好，首席射手穆罕默德沙拿首回合受傷，不過今仗可以復出，雖然隊長佐敦軒達臣要停賽，不過「紅軍」嘅反擊戰術係球壇數一數二，穆罕默德沙拿同沙迪奧文尼速度奇高，對住空群而出嘅曼城大把空間發揮，睇番利物浦近3仗歐聯作客喪入15球，今仗開入球Show機會好大。
分享到：