周四凌晨歐聯8強仲有巴塞隆拿主場鬥羅馬，多年後重返8強嘅羅馬，歐聯客場表現實在太飄忽，面對坐鎮主場向來特別醒嘅巴塞，更加唔會有機會畀呢支意大利球隊發圍，細鬼都係睇好佔主場之利嘅巴塞，讓球主客和巴塞讓兩球，照捧讓球主勝。
（有線62及202台周四凌晨2時45分直播）
美斯撻番着數胡
羅馬相隔8年後再次闖入歐聯8強，肯定希望有所作為，不過球隊中場核心尼恩高蘭上仗聯賽受傷，今場就算趕得切復出，狀態都難有保證，加上表現托弗嘅土耳其攻擊手辛基斯安達仍然倦勤，令球隊實力大大削弱。而且羅馬喺歐聯近14仗作客，除咗今季喺中立場贏過阿塞拜疆嘅卡拉巴克之外，其餘13場從未贏過，客戰成績曳成咁，試問點捧得落手呢？
相反巴塞歐聯喺魯營球場出擊表現都特別有火，近9仗歐聯主場取得8勝1和不敗紀錄之外，當中更有6次贏對手3球或以上，鑊氣十足，其中祖雲達斯同車路士等強隊都要喺魯營俯首稱臣，撞啱球王美斯近排腳風又再順番，隨時揾歐聯經驗明顯欠奉嘅羅馬嚟練靶都唔奇，讓球主客和巴塞讓兩球唔嫌多，讓球主勝有2.5倍捧得過。
分享到：