今晚意甲矚目之戰，祖雲達斯主場對AC米蘭，無可否認榜首祖雲達斯實力勝一籌，但球隊現時存在唔少隱憂，中後場多位主力受傷，下周中又要出戰歐聯8強首回合主場鬥皇馬，教練阿里基今場難免要留有一手，焗變陣起用副選。AC米蘭經過加度素改造後，愈戰愈勇，近10場聯賽取得8勝2和，AC受讓半一，下盤值博。（無綫myTV SUPER 302台周日凌晨2時45分直播）
祖記傷兵多聯賽未必搏盡
意甲6連冠嘅祖雲達斯今季爭標之路，明顯艱辛好多，上場竟然同下游球隊史帕爾打和0比0，認真洩氣，依家僅領先第2位拿玻里2分。祖記最大鑊係進入衝刺大直路先至爆發傷兵潮，中堅基亞連尼、左閘阿歷士辛度、中場基迪拉、古達度、貝拿迪斯治都有傷。人腳短缺之下，仲要兼顧下周中歐聯對皇馬，教練阿里基難免要作出取捨。考慮到聯賽失分仲有得追，歐聯淘汰賽每場都係生死戰，祖記應會暫時以歐聯行先，今場意甲未必搏盡。
反觀，AC米蘭主帥加度素就冇呢方面煩惱，球隊歐霸盃出局後，可集中力量爭取打入意甲前4位，參加下屆歐聯。AC現時落後第4位國米5分，必然踩行油力追。事實上，AC走勢非常凌厲，近10場聯賽8勝2和，包括擊敗2支前列強隊拉素同羅馬，「衝4」鬥心極強。加度素球員時代身為「搶截之霸」，佢執教AC之後，球隊防線亦大有改善，近5場聯賽有4場不失球，作客都頂得住祖記。
分享到：