歐聯8強首回合「西德大戰」，西維爾先喺主場火併拜仁慕尼黑。西維爾事隔60年後再闖歐聯8強，必藉地利搶攻圖搶先機，但以羅拔利雲度夫斯基同湯馬士梅拿為首嘅拜仁鋒線火力強勁，而且每逢作客例必反客為主，今仗兩軍隨時合演入球騷，撐中位數2.5球大盤。
（有線62及202台周三凌晨2時45分直播）
西維爾喺16強兩回合爆冷以2比1淘汰曼聯，自1957年歐冠盃（歐聯前身）後再次躋身8強。中途接手領軍嘅蒙迪拿係少數主攻嘅意籍主帥，早前16強次回合作客曼聯亦照狂攻，全場合共21次射門，證明佢哋無懼同勁旅駁火，今仗必趁主場之利爭取先拔頭籌，唯一隱憂係中場核心班尼加要停賽。
拜仁近8歐聯作客入18球
另一邊廂，近6屆歐聯5度殺入4強嘅拜仁，經驗更豐富，隨住喺德甲遙遙領先，以及季中簽入辛度華拿作輪換後，箭頭羅拔利雲度夫斯基獲得較多休息時間，可養精蓄銳準備喺歐聯搏殺。「羅拔仔」今屆歐聯8仗有5球士哥，中場堤亞高艾簡達拿傷愈復出同另一前鋒湯馬士梅拿回勇，令火力有增無減，加上拜仁作客經常敢於主動出擊，近8仗歐聯作客法定時間入18球，全部開3球或以上，今仗為搶作客入球必定反客為主，入球大好路。
分享到：