C朗入球停不了
歐聯8強首回合立即上演上屆決賽翻版，祖雲達斯先於主場迎戰皇家馬德里，皇馬上年決賽以4比1大炒祖記，成為歐聯改制後，首支成功衞冕嘅球隊。呢支「歐聯之王」喺西甲爭標機會渺茫，更加會全力搶奪歐聯獎盃；教練施丹上仗聯賽特意畀C朗休息，叉足電搏殺，有力翻啅祖記，平手盤必捧皇馬。
（有線602、603、604及662台周三凌晨2時45分直播）
皇馬喺西甲已落後榜首巴塞隆拿13分，基本上衞冕無望，幸好呢支「銀河艦隊」踢歐聯仍然好醒神，上圈更「雙殺」法甲豪門巴黎聖日耳門。事實上，皇馬下半季全面復甦，近11場比賽贏10場，氣勢正盛，好大程度上多得C朗踏入2018年大爆發，呢位葡萄牙巨星今季西甲累積入22球，其中18球係今年先至射入，由1月21日對拉科魯尼亞梅開二度開始，皇馬近12場聯賽，佢上陣9場就入咗18球，換言之平均每場入2球，效率極之驚人。
唔好忘記，C朗今屆歐聯亦轟入12球，排射手榜一哥，佢5次鬥祖記累積入7球，簡直當呢支意甲班霸係「私人靶場」。教練施丹當然深知C朗主宰球隊命運，上場聯賽收起佢，留力今場搏殺，顯示不勝無歸嘅決心。
斑馬兵團殘陣惡頂
祖雲達斯上屆歐聯踢出超水準，仍然功虧一簣，球隊今季水準有下滑迹像，門將保方因傷缺陣多場比賽後復出，狀態麻麻，射手希古恩經常喺大賽失準，實在靠唔住。屋漏偏逢連夜雨，中場比真歷及中堅貝拿迪亞今場都停賽，左閘阿歷士辛度養傷，令教練阿里基排陣好頭痛。祖記巔峰時期都鬥唔過皇馬，更何況今場殘陣，恐怕難逃一敗。
分享到：