澳職季後賽今日全面開打，頭兩場先由常規賽排行第3至第6嘅球隊爭兩個出線名額先，打頭陣嘅就係第3嘅墨爾本城迎戰第6嘅布里斯班獅吼。墨爾本城季尾頻頻搶分成功之下，憑住呢股氣勢成功壓倒同市宿敵墨爾本勝利，成為常規賽季軍。反之布里斯班獅吼能夠進身前6，其實係有啲符碌嘅，呢隊波不善作客，今日一定全力支持主場嘅「墨城」上盤。（有線603及604台周五下午5時50分直播）
首席箭頭科拿路利復甦
「墨城」近5場只係輸咗一場，輸嗰場更係喺已經確定常規賽第3名之下先至輸嘅，所以呢場敗仗大可唔計啦！睇番球隊主場成績，今季踢14場主場比賽只係輸咗5場，主場成績係全澳職排第3。去到季尾，今季長期養傷嘅球隊首席箭頭科拿路利更加全面復甦，上場對威靈頓鳳凰佢更加射入世界波，狀態信得過，今日「夫添」冇傷冇停，加上近5次主場面對「獅吼」不敗，可見上盤穩陣。
如果唔係珀斯光輝同西悉尼流浪唔爭氣，兩隊都喺最後一場常規賽輸波，益咗「獅吼」掹車邊入到頭6名，佢哋先有份踢呢場季後賽啫！其實隊波後防真係唔多掂，近8戰場場都有失波，今日仲有中堅諾夫、艾蘭柏柏杜普路斯同迪維利因傷缺陣，後防更加唔夠人，睇嚟今日好大機會輸波噃。
至於星期日先至踢嘅墨爾本勝利對阿德萊德聯，嚟到季尾「勝利」狀態明顯唔及對手，加上周中先至踢完一場亞冠盃，已經消耗咗唔少，體力來唔來得切恢復都係問題。雖然阿德萊德聯以第5名進身季後賽，但季尾狀態理想，又有中前場球員阿比沙路臣傷愈復出，進攻火力提升唔少。今場受讓之下，我就相信「阿聯」嘞。
分享到：