隨住曼城提早封王，現時英超焦點無疑係護級嘅困獸鬥，最尾3隊西布朗、史篤城及「聖人」修咸頓形勢最危，「聖人」喺周中快車只能悶和李斯特城0比0，再度失分，近8仗聯賽3和5負未贏過，落後「安全線」尾4嘅史雲斯4分兼打多1場，睇嚟新帥曉士都冇乜計扭轉乾坤。
曉士接火棒無能為力
曉士中途接手救火只能盡力而為，但修咸頓今季大跌Watt，高層責無旁貸。過去幾季修咸頓罔顧實力受損，不斷賣走主力只顧賺錢，先後流失拉爾拉拿、洛夫雲、尼達利基尼、勞基梳爾同沙迪奧文尼等球星，又未簽入同等級數球員補充，種下今日禍根。之前仲可以靠主帥出色部署去彌補不足，但上季率領「聖人」取得英聯盃亞軍嘅佩爾，莫名其妙被炒魷，今季搵嚟比歷連奴即無以為繼，「聖人」高層眼見近幾季狂賣人都過到骨，心存僥倖下終嘗惡果。修咸頓聽晚足總盃4強對車路士，心繫護級唔慌會搏盡。
包尾大幡西布朗今季季前曾東征訪港踢英超挑戰盃，當時主帥仍是護級專家佩尼斯，豈料出閘脫腳慘食無情雞，後來接手嘅柏杜亦唔好得幾多，只得1勝5和12負劣績，4月頭亦被Out。依家由戴倫摩亞出任看守領隊，上仗雖然爆冷砌低曼聯，但現時落後「安全線」尾4嘅史雲斯9分兼打多1場，護級可以打定輸數，今晚佢哋主場迎戰有歐聯顧慮嘅利物浦，紅軍戰意同樣難測，睇波算數。
分享到：