歐聯出局一肚氣
西班牙盃決賽今晚爆發，西維爾將會同巴塞隆拿喺新建成嘅萬達大都會球場一決高下。西維爾雖然求勝心切，不過狀態飄忽，實難有力同對手周旋，相反巴塞歐聯8強止步後，肯定全力爭西盃，球隊近年面對西維爾往績優勢明顯，今仗讓1/1.5球照捧上盤。
（周日凌晨3時30分開賽）
西維爾今季啲「海鮮波」真係搞到班球迷（抓）晒頭，皆因呢班波有能力喺歐聯16強技術性擊潰英超強敵曼聯，發揮驚人潛力，同時又可以喺聯賽畀實力麻麻嘅雷加利斯贏番轉頭，令人懷疑球隊嘅穩定性，可見主帥蒙迪拿依然未能有效控制隊波，尤其一班防線主力成日出現注意力唔集中嘅毛病，呢場面對有多位攻擊好手坐鎮嘅巴塞，西維爾肯定會暴露弱點。
往績食住西維爾
巴塞喺歐聯8強止步後，主帥華爾維迪難免要承受唔少壓力，不過一味聲討呢位今季先至接掌教鞭嘅教頭，實在有欠公平，皆因巴塞今季喺本土賽事戰績彪炳，表現有目共睹，唔應該用一時勝負論英雄。
「地上最強」今場戰意十足，隊中除咗進攻核心美斯同蘇亞雷斯狀態上乘，繼續交出超班表現外，最近連新兵菲臘比古天奴都交到貨，似乎已經融入球隊打法，進一步加強巴塞進攻能力，而且巴塞近6次同西維爾交手，取得5勝1和，尤其近兩次盃賽碰頭巴塞都大獲全勝，往績佔盡優勢，今仗有望再取佳績，一吐歐聯出局嘅烏氣。
分享到：