羅馬留力歐聯
今日有近百場波玩，難免花多眼亂，阿King特登揀幾場好嘢益大家，最有心水係意甲頭場史帕爾主場對羅馬。羅馬下周中要喺歐聯硬撼利物浦，話唔留力你都唔信喇，睇怕讓唔起近8場未輸過、急於護級搶分嘅史帕爾，讓球主勝咪錯過。
（myTV SUPER 303周六晚9時直播）
雖然羅馬聯賽前4未穩陣，但嚟緊周中歐聯4強首回合作客利物浦，睇番佢哋喺8強反勝巴塞嘅勢頭，就知呢支首都球隊幾咁重視歐聯，有傳射手迪斯高、剛傷愈嘅中場尼恩高蘭今場唔會踢足，甚至有機會被收起添，留力之說並非空穴來風。另一邊廂，史帕爾依家排尾4，只係比尾3嘅克羅托內多1分，為搶分護級戰意必堅，唔好睇佢哋位列下游，近8仗聯賽取得2勝6和不敗佳績，包括近6仗全和只失3球，防守硬淨，面對有後顧之憂嘅羅馬仲有得受讓咁筍，一於捧讓球主勝。
切爾達行運賓菲加鑊氣夠
至於西甲方面，切爾達主場對華倫西亞，「4哥」華倫唔單止聯賽2連敗，今仗仲有後衞荷西加耶同中場兼隊長柏利祖坐波監，實力打折扣，讓唔起剛戰逼和巴塞嘅切爾達。（Now 632周六晚10時15分直播）最後葡超「2哥」賓菲加作客艾斯杜尼，賓菲加上仗榜首大戰輸畀波圖堅傷，依家落後2分，為爭冠軍今仗不容再失，艾斯杜尼只屬下游分子， 難擋決心十足嘅賓菲加，就算賓菲加讓1/1.5球照捧上盤。
（周日凌晨3時30分開賽）
分享到：