齊爭升班搏甩髀
英冠今晚爆發升班大戰！力爭附加賽資格嘅打比郡主場迎戰「二哥」卡迪夫城，今場比賽原本喺3月中舉行，不過因為大風雪而改期，依家兩隊都為升上英超搏晒命，令呢場補賽更加有睇頭。卡迪夫城尚差兩場勝仗就可以重返英超，爭勝意欲超強，對住有前冇後嘅打比郡，「大」有機會合演入球騷！
（周三凌晨2時45分開賽）
打比郡季中開始一直佔據聯賽前6位，甚至有超過1個月時間高踞第2位，不過季尾突然大跌Watt，早前經過聯賽3連敗後，已經跌落第7位，要搶番附加賽資格（前6位）的話，今仗實在不容再失。事實上打比郡近6次主場出擊只贏過1仗，雖然每場比賽都有波入，但可惜當中合共失咗11球，防守差係打比郡致命傷，既然守唔住，要搶分唯有靠狂攻搭救。
2500粉絲隨卡城征戰
卡迪夫城近兩仗分別擊敗諾域治及諾定咸森林，如今重上聯賽第2位，領先第3位嘅富咸1分兼少踢1仗，意味卡迪夫城只要喺最後3仗當中贏2仗，就可以攞到直接升班資格，目標明確戰意肯定一流，而且2,500個威爾斯Fans已經買晒飛隨隊出征打氣，「第12人」威力勢必令攻擊力不俗嘅卡迪夫城踢得更加進取，今仗捧入球大最好不過。
分享到：