沙拿倒戈雌狼坎坷
歐聯4強首回合開波啦，今晚率先上演利物浦主場迎戰羅馬。「紅軍」利物浦有姿勢有實際，唔止係今屆4強入面唯一不敗之師，攻力亦冠絕同儕，「埃及文明」鋒線穆罕默德沙拿、沙迪奧文尼、羅拔圖法明奴合共轟入23球，以「雌狼」羅馬近3仗歐聯作客全敗嘅頹勢，實在無力招架。利物浦勢必趁地利盡數對手，為晉級奠定基礎，讓球盤「紅軍」讓一球，上盤冇甩拖。
（有線662、604、602及603台周三凌晨2時45分直播）
利物浦今屆歐聯由附加賽開始，踢了12仗比賽共取得8勝4和，而由分組賽至今攻入33球，亦係4強球隊之中最多。「埃及美斯」穆罕默德沙拿貢獻咗8球，佢今季各項賽事已經有41球進帳，腳風極之順，呢位翼鋒今仗倒戈，熟晒羅馬路數，入波更加容易。
「埃及文明」能夠有超卓發揮，亦要多得領隊高普戰術奏效，預料佢會沿用8強首回合主場對曼城嘅踢法，以快速行軍強攻對手，該仗紅軍只用31分鐘就攻入曼城3球，令對手冇得翻身。強如英超盟主都落得如此田地，更何況爆冷入4強嘅羅馬。
羅馬近3歐聯作客全敗
相比之下，羅馬對上2圈晉級帶點運氣，16強僅憑作客入球優惠淘汰薩克達，8強首回合作客巴塞隆拿更輸1比4，要次回合返主場3比0大勝表現失準嘅巴塞，先至晉級4強，表現略嫌飄忽。無獨有偶，羅馬對上2圈首回合同樣作客先輸波，如果連同分組賽作客不敵馬德里體育會0比2，羅馬近3仗歐聯作客錄得全敗劣績，今仗作客晏菲路，再次大敗都唔奇。
分享到：