送別雲格mode啟動！阿仙奴老帥雲格日前宣布季尾離任，今晚英超主場迎戰「錘仔幫」韋斯咸，相信眾將都希望喺餘下賽事盡力爭勝，令「雲爺爺」好頭好尾光榮告別，挾主場5連勝嘅強勢，今仗有力炒起韋斯咸，讓一球照捧上盤。
（Now 621周日晚上8時30分直播）
雖然阿仙奴緊接就要出戰歐霸4強首回合對馬體會，但老帥雲格日前宣布今季季尾離任，結束長達22年嘅「廠長」生涯，聯賽連歐霸在內，今仗對韋斯咸，係雲格倒數第3仗喺主場酋長球場領軍，呢一刻無論係本身「迷雲」定「反雲」粉絲，以及全隊上下，都希望餘下賽事踢得好好睇睇，令「雲爺爺」可體面地離開，戰意唔使懷疑。而且若阿仙奴繼續失分，畀般尼過頭跌落第7位嘅話，下季就要出戰歐霸外圍賽，大大影響球隊新球季備戰。
韋斯咸上岸戰意鬆懈
另一邊廂，韋斯咸嘅護級之路已經差唔多「上岸」，球員鬥心或會有所鬆懈，而且佢哋近5仗作客賽事只係得1和4負，門將赫特更頻頻犯錯，搞到成條防線都冇晒信心，今仗作客酋長球場凶多吉少。阿仙奴已啟動送別雲格mode，亦想喺出戰馬體會之前大勝振軍心，加上近5仗主場又贏晒，讓一球照捧上盤。
分享到：