歐聯4強戰開打，我雖然冇特別支持某支球隊，但要喺4強入面揀1隊，我當然會選擇利物浦。佢哋喺高普領導下踢出悅目足球，而且仲畀顏色「叛徒」菲臘比古天奴睇，證明「冇咗你，利物浦一樣得」。
不過根據我嘅經驗，大戰前任何球會、球員被人捧得太高，或者有球員當選最佳球員，都係「邪」過比薩斜塔！所有教練都覺得，比賽前愈低調愈好，可惜事與願違，「埃及王子」穆罕默德沙拿啱啱拎到英格蘭球員先生，又破利物浦入球紀錄，真係鋒芒畢露。我的確好欣賞沙拿，上年7月嚟香港踢英超亞洲盃，佢嘅表現同入波已令我嘆為觀止，佢係真正嘅「禁區之狐」，門前機會可以話實食冇黐牙，可惜佢依家賽前拎獎，對住「豬頭骨」羅馬唔易食。
羅馬對住巴塞隆拿輸3球都追得番，實力可想而知，大家好可能只係掛住睇前鋒，唔記得羅馬有當今巴西首席門將艾利臣比加把關，我相信佢可以喺今夏世界盃大放光彩（希望我呢個講波佬把衰口唔好邪到佢）。好多人覺得利物浦喺歐聯4強抽到羅馬係「上上籤」，不過波係圓嘅，戰果往往出人意表，利物浦今晚係咪可以拎到絕對優勢？我覺得有極大難度。總之踢大賽前有球員攞獎同受吹捧，係壞事而非好事。
分享到：