今晚賽事唔多，但阿King都有好嘢推介畀大家，首選意甲熱拿亞主場對維羅納，熱拿亞唔係特別叻，但問題係維羅納實在衰到貼地，近5場作客全敗兼冇波入，加上中堅阿歷士費拉利停賽，令防線雪上加霜，隨時又大敗，熱拿亞讓一球，上盤撐得過。
（無綫myTV SUPER 302周二凌晨2時45分直播）
熱拿亞已冇護級壓力，但並未放軟手腳，主場出擊更取得2連勝，前鋒拿柏度拿狀態非常弗，近5場聯賽射入3球，包括上仗射破羅馬大門，呢位AC米蘭借將為爭取長約，今季餘下賽事肯定加多幾錢肉緊，鬥心有保證。
過關預埋波圖佐加頓斯
維羅納仲要搶分護級，礙於實力太弱有心無力，客戰又腳隻軟，近5場作客都以2球或以上差距輸波，最離譜係淨吞包尾嘅賓尼雲圖3蛋，今場面對實力更強嘅熱拿亞，大敗一啲都唔奇。
其餘心水，葡超波圖全力衝冠，聯賽主場已8連勝，今仗主場對下游弱旅塞圖巴爾，實在冇理由失拖，波圖讓兩球，都要讓球主勝。
瑞典超方面，艾夫斯堡今季兩次聯賽主場出擊都輸波，今仗主場迎戰實力分子佐加頓斯，即使受讓平半都捧唔過，撐佐加頓斯上盤。
分享到：