往績恰聖人基奧特大勇
今晚溫布萊球場上演英格蘭足總盃4強大戰，車路士硬撼「聖人」修咸頓。車仔前鋒基奧特狀態大勇，加上近年交手佢哋都食住修咸頓，呢場有力贏波挺進決賽，車路士上盤捧得過。
（ViuTV 99及Now 633周日晚上10時直播）
干地上季帶領車路士重奪英超王位，仲一舉掀起343陣式嘅復興熱潮，影響深遠。不過好景不常，車仔今季各條戰線都先後冧檔，繼歐聯同英聯盃出局之後，英超仲頻頻失分，好可能連前4都保唔住，痛失下季歐聯入場券，對失望嘅車仔球迷嚟講，干地季尾「落車」早已成定局，不過佢話晒係功勳教頭，冇功都有勞，相信車仔眾將為捧盃肯定會搏盡，令呢位意大利教頭可以光榮告別。查實車路士上屆英足盃都殺入決賽，只係最終不敵靠盃「續命」嘅雲格所領軍嘅阿仙奴，今季睇好佢哋捲土重來。
修咸頓志在護級難分心
修咸頓繼2003年後再次挺進英足盃4強，可惜「聖人」自新帥曉士接手後表現都仲係咁曳，班波依然未擺脫聯賽榜下游位置，護級形勢十分嚴峻，邊會有心情兼顧盃賽，況且佢哋近5次面對車仔全部輸晒，包括前幾日喺聯賽先取得2球大好局面情況下，畀車仔殺手基奧特梅開二度，最終輸返2比3，明顯畀車仔食住，呢場睇怕都凶多吉少。
分享到：