爭霸直路 雙雄生死戰
意甲榜首大戰，「一哥」祖雲達斯主場鬥拿玻里；祖記上輪聯賽意外被克羅托內逼和，現時僅領先次席拿玻里4分，令爭標形勢再起波瀾。拿玻里今仗肯定把握最後機會，爭取贏波收窄積分差距，勢必豁出去一搏，有前冇後打死罷就，預料會有大手交易，揀中位數2.5球嘅入球大。
（無綫myTV SUPER 302周一凌晨2時45分直播）
祖雲達斯喺歐聯出局之後，聯賽錦標更加不容有失，但上仗一時輕敵，作客被克羅托內逼和1比1，對球隊無疑係一大打擊。祖記吸取教訓之後，今仗遇上意甲爭標對手拿玻里，肯定要使出真功夫打沉對手，令拿玻里冇得翻身。睇番祖記主場表現的確威力十足，今季聯賽16仗當中錄得14勝1和1負，保羅戴巴拿同希古恩呢對進攻組合，至今已為球隊合共攻入36個聯賽入波，加上「斑馬兵團」近6次主場對拿玻里，獲得全勝，其中近5場有4次總入球係3球或以上，可見雙方對碰往往互相搏拳。
「攻」兵晒冷全力搶分
拿玻里今季大部分時間排榜首，但踏入3月後連番失分，結果被祖記反超。難得爭霸對手上仗失分，拿玻里今仗只要贏波，就可以追至僅落後1分，重燃捧盃機會，肯定盡地一煲搶攻。事實上，拿玻里一向崇尚進攻，梅頓斯、荷西卡利祖、恩斯治尼、咸錫都係進攻好手，有充裕本錢同祖記駁火，可望上演入球騷。
分享到：