利物浦王牌穆罕默德沙拿今季有幾威，破咗幾多紀錄，相信讀者都好清楚，唔使我多費唇舌，今日想同大家講故事，一個同沙拿有關嘅兩位波士頓商界達人嘅買賣故事。
查實沙拿喺2014年1月已經初登英超加盟車路士，可惜當時太過年輕，猶如一塊未被琢磨嘅璞玉，在急功近利嘅「寸王」莫連奴麾下未受重用，最終成為球隊收購古達度嘅籌碼而轉戰意甲費倫天拿，其後嶄露頭角被羅馬收歸旗下。雖然沙拿喺羅馬表現唔錯，可惜撞正有中鋒迪斯高坐鎮，佢只能在兩翼搵食，冇依家咁Sharp醒，幸好利物浦主帥高普獨具慧眼，認定呢位埃及國腳可以成「禁區之狐」，於是向美國班主約翰亨利推薦收購。
眾所周知，約翰亨利係一名出色嘅波士頓商人，擅於收購隊際體育球隊，不但係「紅軍」老闆，同時係美職棒球隊波士頓紅襪嘅班主，咁啱羅馬班主柏洛達亦係波士頓人，同時係NBA球隊波士頓塞爾特人嘅話事人之一，既然利物浦肯出高價求賢，柏洛達亦願意放人，成就沙拿今季發光發熱。事後有人取笑柏洛達，若早知沙拿咁勁應該遲啲先放，但呢位精明嘅商人同筆者諗法一樣，強調任何事都冇得早知，亦唔會後悔，況且佢只用一年時間已喺沙拿身上賺咗近3倍嘅錢，而「紅軍」又實力大增，絕對係一宗「3贏」交易。
球員有料亦要伯樂賞識
人生際遇變化莫測，沙拿嘅故事話畀大家知，球員想成功除要有料之外，亦要獲伯樂賞識。雖然失意於車路士，但高普認定沙拿適合其前線3叉戟輪流換位戰術，約翰亨利又肯重金收購，先有今日全面升呢嘅「埃及美斯」出現於各位球迷面前。
分享到：