離隊在即唔想失威畀死敵
今晚英超大戰曼聯主場對阿仙奴，主Ｗ質到落1.37倍，相信都算歷史性低位咁滯，莊家咁睇淡阿仙奴，全因佢有歐霸顧慮，幾日後要作客馬體會爭入決賽，今仗隨時留力，但樂比唔係咁睇，「廠長」雲格宣布季尾離隊後，真係踢1場少1場，嚟到季尾得番幾場仲要揀波踢？樂比信多雲格一次，捧阿仙奴受讓一球嘅2.1倍下盤。
（Now 621周日晚11時30分直播）
阿仙奴近4作客奧脫福僅1敗
「永續雲爺爺」失敗，除「迷雲黨」失落外，估唔到連一向心高氣傲嘅莫連奴都傷感無限。無他，雲格絕對係「寸王」一生之中奚落次數最多嘅對手，甚麼「偷窺狂」、「失敗專家」一大堆花名都係莫連奴幫佢改，以後冇咗雲格嘅日子，莫連奴可能要另覓目標。單計兩位主帥18次交手，雲格成績係2勝7和9負，差係差咗啲，但近4次作客奧脫福僅1敗，況且離別在即「雲爺爺」點都唔想輸多次畀自己嘅頭號死敵。
雲格選擇喺季尾時候公布離任消息，無非想激勵士氣，希望一班「槍手」喺餘下比賽大打爭氣波，甚至捧走歐霸盃留作美好回憶。今場對阿仙奴嚟講或者係例行公事，但曼聯又何嘗唔係？歷史話畀我哋知，4年前排榜首嘅利物浦捧盃在望，對住幾日後要踢歐聯4強次回合，又係對馬體會嘅車路士，喺一致睇好嘅情況下主場輸波，結果同英超冠軍擦身而過，所以阿仙奴今場唔係輸梗。
Keep住士氣迎戰馬體會
自從雲格公布離隊消息後，「兵工廠」近兩場1勝1和，歐霸4強首回合對馬體會打多個都贏唔到確實可惜，但比賽初段11個對11個嘅時候，阿仙奴整體表現亦好搶鏡，今場即使輪換亦唔想打窒自己道氣，影響嚟緊嘅大戰，今場和波絕對係皆大歡喜嘅結局，相信兩位冤家亦樂見。
分享到：