歡送恩尼斯達 和波即封王
周一凌晨西甲尾場，拉科魯尼亞將會主場挑戰巴塞隆拿。今季打遍西甲無敵手嘅巴塞，呢場攞1分即可提早封王，今仗肯定進取，佢哋近年對親拉科都有大把入波睇，今場再遇為護級背水一戰嘅拉科，中位數3.5球大盤捧得過。
（Now 632周一凌晨2時45分直播）
巴塞早前成功衞冕西班牙盃，雖然值得慶賀，不過依然難掩歐聯再次遭淘汰的悲痛，加上老將恩尼斯達啱啱含淚宣佈季尾離隊，為送別呢位功勳隊長，巴塞肯定會全力爭取聯賽封王。查實若然較早時間開波嘅馬德里體育會失分，巴塞賽前就已經可以提前鎖定聯賽冠軍，不過為達成以不敗姿態奪冠嘅壯舉，相信呢場巴塞都依然會盡力搶攻。
尾3拉科救亡要焗攻
另一邊廂，排尾3嘅拉科想搶分要問過1哥巴塞，惡戰當前，球會都依然不忘先禮後兵，拉科官方就講到明賽前會為巴塞列隊鼓掌，祝賀佢哋早前捧得西班牙盃。不過為逃離降班區呢場拉科冇得唔贏，所以今仗就算冒住後防空虛嘅代價，都肯定會壓上進攻放手一搏，球隊近7次面對巴塞就有6次開4球或以上，呢場對攻戰預期又係入球騷。
分享到：