已提早宣布聯賽6連霸嘅拜仁慕尼黑，雖然實力佔優兼有主場之利，不過今晚迎戰法蘭克福肯定面臨嚴峻考驗，皆因今仗夾喺拜仁歐聯4強戰對皇家馬德里兩回合之間，拜仁首回合主場落後1比2，想收復失地，3日後作客馬德里除咗要贏，仲起碼要取得兩個作客入球至有價講，不過教練軒歷基斯揚言次回合可以扭轉劣勢：「我哋首回合取得大量射門，咁都輸波的確相當奇怪，不過兩回合比賽只完成咗一半，我哋仲有足夠時間反敗為勝。」
唯一肯定嘅，係拜仁已經將所有精神集中喺皇馬身上，今仗除咗紐亞、謝路美保定、京士利高文、維達爾同洛賓因傷缺陣外，重心球員包括羅拔利雲度夫斯基、列貝利、占士洛迪古斯、甘美治同阿拉巴等都會休息，只會派B隊應戰，而且仲會盡量拖慢節奏慳體力，避免受傷，根本冇需要同法蘭克福硬撼。
法蘭克福挑戰班霸決心堅
相反，法蘭克福正力爭下屆歐戰入場券，教頭尼高高華已落實下季加盟拜仁，但會方賽前以另類方法激勵士氣，重提法蘭克福上次有教練轉投拜仁，已經係40年前嘅事，當時嘅匈牙利教頭路蘭特，喺轉投拜仁前帶領法蘭克福連贏拜仁4次，包括1977年11月喺4日之內，於歐洲足協盃同聯賽連炒拜仁兩次4比0，希望尼高高華可以喺今晚同下月19日嘅德國盃決賽，重溫路蘭特好夢為法蘭克福送上厚禮。尼高高華對今仗亦好有信心：「每次對拜仁，球員都會自動自覺加把勁，首循環我哋僅負0比1但表現出色，依家拜仁肯定會掛住歐聯，今晚落場嘅都係副選居多，我哋會好好把握呢個搶分良機。」今場法蘭克福受讓，讓球客勝有2.35倍好值博。
分享到：