今季意甲成為歐洲5大聯賽爭標形勢最激烈嘅戰場，榜首祖雲達斯連續2場失分，僅領先次席拿玻里1分，更唔好彩今仗又要作客硬撼國際米蘭。祖記近3次作客鬥國米，僅得1和2負，加上狀態走下坡，防線又多傷兵，更加讓唔起對手，捧受讓平半嘅國際米蘭下盤。
（無綫myTV SUPER 302台周日凌晨2時45分直播）
祖記「黑色4月」陷困局
祖雲達斯跌入「黑色4月」，先係歐聯出局，其後聯賽又連番失利，最離譜係被克羅托內逼和，上仗仲輸埋畀拿玻里，難免洩氣。事實上，祖記攻守都出現問題，前鋒希古恩陷入入球荒，近5次聯賽上陣都食白果，拍檔保羅戴巴拿近3場亦冇波入。防線上則有中堅基亞連尼、右閘迪施基利奧受傷，最大鑊係盛傳教練阿里基好可能今季結束後離隊，為球隊平添不明朗因素，勢必打擊士氣，更難打破近年作客國米，處於下風嘅困局。
國際米蘭僅落後第4位拉素1分，仲有機會打入前4位，參加下屆歐聯。球隊眾志成城，連贏2場，莫路伊卡迪、比列錫仲一齊有波入，兩人今季已轟入37球。值得一提，國米上季主場就係憑莫路伊卡迪、比列錫入波，反勝祖記2比1，祖記防線今場人腳不整，莫、比兩人隨時有更多搵食機會。加上國際米蘭近8場主場不敗，受讓下盤相當值博。
分享到：