今晚歐聯4強次回合大戰，羅馬返主場再鬥利物浦，首回合紅軍大勝5比2，但好多球迷都對紅軍一度領先5球下，卻於末段疏忽被追番2粒，令羅馬出線仍未絕望而大惑不解，或許可從兩軍主帥嘅執教理念搵到答案。
筆者睇波睇咗近70年，睇住足球戰術不斷演變，由上世紀50年代WM陣式、即5人進攻及5人防守，走動少講求位置感，單計陣型與上季干地率領車仔雄霸英超343陣式相似，其後短暫出現過424陣式，就到英格蘭於1966年捧走世盃嘅功勳主帥藍西爵士發明442陣式，去到70年代荷蘭刮起全能足球、十上十落嘅旋風，踏入80至本世紀初，442、352、433及4231陣式輪流爭鋒，直到哥迪奧拿嘅傳控打法，令巴塞及西班牙橫掃球壇，從而再引伸出與其相生相剋嘅緊迫足球，正是羅馬主帥迪法蘭斯高及利物浦領隊高普嘅拿手好戲。
兩人均屬前衞、有主見嘅新浪派足球教頭，崇尚全場狂風式嘅緊迫打法，特別係針對巴塞式由後場層層推進上前嘅戰術，希望在中前場做足搶截工夫，務求使對方在後場斷纜，快速轉守為攻製造埋門，呢種打法需要全民皆兵兼有極充沛體力，高普與迪法蘭斯高嘅球隊並非可一擲千金買頂級球星嘅豪門，因此會以此戰術彌補球員質素上嘅不足。舉個例子，紅軍中場占士米拿一向都唔起眼，但今屆歐聯竟然交出9次助攻，全因佢擅於搶截，繼而即放直線畀3叉戟穆罕默德沙拿、羅拔圖法明奴及沙迪奧文尼搵食，簡單而高效。
壓迫戰術不斷獻上入球騷
不過針無兩頭利，呢種狂風式嘅全緊迫足球，消耗極大，通常在比賽末段會出現體力不繼情況，講番首回合嗰場，紅軍明顯喺末段體能下降，並換走前線最具威脅嘅穆罕默德沙拿，令羅馬可豁出去反而壓迫番對手，並收穫2個重要作客入球。今屆歐聯場均入球達3.17個，係史上入球率最高嘅一屆，例如利物浦在16強狂數波圖5粒、拜仁兩回合以8比1轟走比錫達斯、羅馬落後3球下逆轉淘汰巴塞，以及紅軍4強首回合大勝5比2，就係呢班新浪派足球教頭，為今屆歐聯不斷獻上精彩入球騷。
分享到：