前車可鑑拒絕羅馬奇迹
今晚歐聯4強次回合，羅馬主場迎戰利物浦，首回合羅馬大敗2比5，形勢好惡劣，雖然呢支意甲球隊曾於8強絕地反擊，爆大冷淘汰巴塞隆拿，但「奇迹」往往可一不可再，特別係有前車之鑑，利物浦肯定打醒十二分精神，絕對唔會留手，以「埃及文明」鋒線嘅勇態，有力反客為主「雙殺」對手，平手盤捧利物浦。
（有線662、604、602及603台周四凌晨2時45分直播）
羅馬8強次回合大勝巴塞隆拿3比0，其實表現並非特別出色，只係巴塞嚴重失準，今場要重演「逆轉勝」好戲，除非「紅軍」又撞埋邪。不過機會應該相當低，事關利物浦今屆歐聯踢得實在太順暢，由附加賽踢到4強，都未輸過，成為4強之中唯一不敗之師。
球員發揮好壞，往往受心理因素影響，利物浦全隊士氣高昂，愈踢愈有信心，想輸都難，更加唔好話會突然失準。同埋利物浦領隊高普都希望球隊繼續贏波，保持氣勢，一鼓作氣打入決賽捧盃，所以就算現時領先3球，都會力爭凱旋而歸。
主隊焗攻 啱晒紅軍反擊
從戰術層面上，利物浦快速反擊踢法，正好於現時形勢大派用場，因為主隊羅馬被迫焗攻，防線難免空虛，「紅軍」反擊快，屆時應該有大把機會直插對手心臟。「埃及文明」鋒線穆罕默德沙拿、沙迪奧文尼、羅拔圖法明奴腳風極順，3人於今屆歐聯已合共轟入28球，占士米拿有9次助攻，任何球隊面對呢個夢幻進攻組合，都好頭痛，更何況羅馬防線偏弱，更加守唔住佢哋。
羅馬可以進身4強，已經超額完成，今場求反勝嘅決心，未必夠8強對巴塞時咁強，一旦遲遲未能先開紀錄，甚至先失波，信心肯定崩潰，隨時再次兵敗如山倒。
分享到：