主隊唔識守客軍焗住攻
周三凌晨歐聯4強次回合大戰，皇家馬德里將會返到主場再鬥拜仁慕尼黑。皇馬雖然首回合以2比1先拔頭籌，不過佢哋今季後防出晒名多甩漏，呢場寧願以攻代守入多幾粒好過，加上落後嘅拜仁肯定搶攻，呢場肯定又有入球騷睇，中位數3.5球入球大咪走雞。
（有線662、604、602及603台周三凌晨2時45分直播）
首回合輸波嘅拜仁，由於畀皇馬搶到2個作客入球，呢場起碼要入2粒先有機會晉級，除此之外佢哋仲有洛賓同謝路美保定兩位大將喺首回合激戰中，因傷退下火線，次回合肯定齊齊缺陣。雖然處於劣勢，不過德國班霸絕對唔係冇得追，尤其睇番首回合，就算主力攻擊手洛賓早早傷出，其實拜仁都有能力創造出唔少入球機會，只係差臨門一腳，可見班波底蘊雄厚，呢場搶韁絕對有能力威脅皇馬後防，加上老帥軒歷基斯近兩次執教拜仁出戰歐聯，都成功帶領球隊殺入決賽，有佢教路拜仁肯定有得追。
巴拿貝近3歐聯最少4粒
今季表現飄忽嘅皇馬，已經多次出現短路嘅情況，好似歐聯8強面對祖雲達斯嗰陣，就喺次回合畀對手以3比1擊敗，差啲斷送首回合嘅3比0大好領先局面，晉級過程夠晒驚險。而且後防主力丹尼爾卡華積首回合整親，呢場肯定唔使預佢，進一步削弱防線實力。所以為爭入決賽，皇馬都唔會靠守，肯定會強攻拜仁，爭取拉開領先優勢。銀河艦隊近3仗歐聯喺巴拿貝主場就全開4球或以上，睇怕呢場對攻戰肯定走唔甩，中位數3.5球大盤值博。
分享到：