阿仙奴作客焗攻
周五凌晨歐霸4強次回合大戰，馬德里體育會主場出擊再鬥阿仙奴。首回合馬體會1比1逼和兵工廠，拎住作客入球優勢，加上主帥施蒙尼領軍下，馬體會喺自己地頭表現實在太強，今場度士唔使諗咁多必揀1.65倍主勝。
（Now 633周五凌晨3時05分直播）
領隊雲格喺阿仙奴教足22年，好快嚟到季尾就要同「廠迷」講拜拜，一班槍手梗係希望喺教授臨走前，贏番隻歐霸盃畀佢；不過兵工廠首回合主場唔爭氣，全場大部分時間踢多一人都冇辦法拉開比數，臨尾仲畀對手追番粒逼和，士氣大受影響，晉級形勢處於被動，今場兩位攻擊手米希達利恩同伊禾比都有傷上陣成疑，作客更加冇能力同馬體會周旋。
兵工廠雙箭負傷頭痕
相反，今仗攞住關鍵作客入球返主場嘅馬體會，優勢雖然唔算明顯，不過對擅踢反擊嘅主帥施蒙尼嚟講絕對夠晒數；首回合踢少1個，雖然幾乎全場畀阿仙奴撳住嚟砌，不過都可以靠前鋒基沙文嘅高效反擊入番1球，而且馬體會近11仗主場贏足10場，面對焗攻嘅兵工廠，馬體會可趁對手谷得太前，後防空虛再發揮反擊強項，度士睇好馬體會贏波入決賽。