易帥後全面回勇
周六凌晨西甲獨腳戲，西維爾將會主場迎戰皇家蘇斯達。西維爾近期走勢一落千丈，連主帥蒙迪拿都炒埋，球會內部立立亂，班波表現點會好。相反「皇蘇」上仗換帥後狀態明顯有起色，信得過，讓球客勝值博。
（Now 632周六凌晨3時直播）
表現飄忽嘅西維爾，歐聯同西班牙盃兩頭唔到岸全部出局，而且自3月起已經7場聯賽未贏過波，搞到球隊跌到落聯賽第8位，來季歐戰入場券凍過水，結果主帥蒙迪拿繼季初畀羅馬叮走之後，去到西甲再畀西維爾炒多鑊，認真羞家。加上球會內部動蕩嘅問題依然陰魂不散，早前連總監都被辭退，呢次就算揾嚟老帥卡柏路斯接手，一時三刻未必可以擺脫頹勢。
恩馬奴爾領軍有料到
另一邊廂，皇家蘇斯達新帥恩馬奴爾上任後，球隊近6仗聯賽取4勝1和1負戰績回勇，包括以3比0大破馬德里體育會，期間只係失過3球咁大把，一改後防甩漏嘅情況，上輪「巴斯克打吡」鬥畢爾包仲精彩，憑對手嘅基米聖荷西2次「送大禮」，以3比1贏波，連運氣到有埋，呢場絕對有力喺客場同走勢下滑嘅西維爾周旋，讓球客勝唔好錯過。