紅魔風流波Hea踢應酬
今晚有英超優先場，白禮頓主場迎戰曼聯，白禮頓陷入護級「地獄賽程」，餘下3仗對手係曼聯、曼城、利物浦。不過細心留意一下，其實呢3支豪門已經志不在聯賽，紅魔鬼早就穩佔前4位，曼城更加捧埋盃，利物浦全力備戰歐聯決賽。白禮頓有力偷雞攞到分，今仗受讓捧讓球主勝。
（Now 621周六凌晨3時直播）
白禮頓現時領先尾3嘅修咸頓5分，表面上護級壓力唔算太大，但考慮到對手始終係曼市雙雄同利物浦，一定要打醒十二分精神，否則一旦3場輸晒，搞到降班亦唔出奇，為免晚節不保，餘下3仗都要搏命搶得1分得1分。
白禮頓未上岸鬥心強
事實上，白禮頓踏入季尾護級階段，主場出擊鬥勁旅，表現非常醒神，3月贏過阿仙奴2比1，上月打和熱刺1比1。今仗係白禮頓今季最後1場主場比賽，更加要把握機會攞分，鬥心一定強。
曼聯領先第5位嘅車路士11分，肯定穩佔前4位，可以參加下屆歐聯，餘下3場聯賽基本上已經成為「例行公事」。紅魔鬼今季餘下目標係兩星期後嘅英足盃決賽對車路士，依家最重要保持人腳完整，唔好出現傷兵或者疲態，落到場隨時Hea踢「應酬」對手。
值得一提，曼聯上月輸過畀另一支護級球隊西布朗，同埋睇番今季英超首循環，曼聯主場都只係靠白禮頓球員擺烏龍小勝1比0，更何況今場作客，戰意成疑下讓波更加捧唔過。