國家打吡睇準先嚟料
今晚嘅「西班牙國家打吡」原本係球壇大事，但今季情況有啲特別，主場嘅巴塞隆拿晨早喺聯賽封王，作客嘅皇家馬德里亦鎖定前4位置，加上全副心機放喺歐聯，作戰心態未必十足，堂堂大戰變例行公事。兩隊近年交手慣睇定嚟踢，2.7倍半和玩得過。
（Now 632周一凌晨2時45分直播）
今季西甲次循環國家打吡安排喺尾2一輪上演，相信賽會如意算盤係希望今場變做冠軍終極戰，可惜事與願違。事實上巴塞上輪贏波後提早封王不特止，今季長期喺聯賽放到「甩晒轆」，遠遠拋離包括皇馬在內嘅一班追兵。今季先上任嘅主帥華爾維迪可謂功不可沒，門將達史特根早前就咁評價呢位教頭：「以前佢經常帶隊同巴塞過招，加盟球隊後，佢可以用外來人嘅身份彌補我哋不足。」巴塞依家追求嘅只係全季聯賽不敗，就算對住死敵都唔使急於搶攻，寧小心應戰。
近7次交手6開半和
皇馬衞冕聯賽早早無望，自然將精力擺晒落歐聯度，尤其距離「歐聯3連霸」呢個驚人成就只差一步，主帥施丹梗識分輕重，對住巴塞都唔慌會搏。皇馬首循環主場淨吞巴塞3蛋，加上啱啱喺歐聯同拜仁搏鬥完，體力上較輸蝕，今場自然穩陣行先，兩隊近7次交手有6次半場不分勝負，半和值得支持。