干地保飯碗盡地一煲
今晚英超上演前4爭逐戰，由第5位嘅車路士主場迎戰利物浦。紅軍已將目標放喺歐聯決賽，球員嘅心早已飛咗去基輔，況且爭取來屆歐聯入場券形勢大好，心態上唔及冇後退之路嘅車路士，加上搏完歐聯隨時未回氣，車仔今晚有機會偷雞，車路士讓平半上盤博得過。
（Now 621周日晚11時30分直播）
未分析場波前先講下形勢，利物浦領先車仔6分但踢多1場，由於煞科戰係主場對已上岸嘅白禮頓，即使車仔最後3場聯賽贏晒，只要利物浦最後1場擊敗白禮頓，仍好大機會憑得失球差壓倒對手（兩隊目前得失球相差17球），就算真係咁唔好彩連白禮頓都贏唔到，利物浦仍有機會以歐聯冠軍資格取得來季歐聯入場券，可謂雙重保險。
心繫歐聯 英超輸得起
樂比一向認為踢波除咗實力較量之外，戰意亦非常重要，輸唔輸得起更加係關鍵，好似歐聯4強次回合，利物浦就係因輸得起，所以先以2比4不敵羅馬晉級，同樣情況利物浦今場唔贏亦冇所謂，決心唔及對手下，好容易鬆懈被車仔有機可乘。
當然要同如日方中嘅利物浦作對並唔容易，但利物浦確實存在唔少問題，歐聯連場硬仗已令球隊聯賽接連失分，之前兩場分別被榜尾嘅史篤城、西布朗逼和，充分反映球隊受歐聯後遺症所影響，加上目前傷兵不少，阿歷士張伯倫、安利簡恩、祖爾麥迪比及祖高美斯均養傷，大大削弱咗班波嘅中後場調動。
車路士今季表現令人失望，但近日總算狀態提升，連贏4場並打入英足盃決賽，領隊干地飯碗保唔保到，就要睇歐聯席位搶唔搶到番嚟，由於形勢不利，對佢嚟講可謂打定輸數，冇壓力下表現反而可能更好。
基奧特5鬥紅軍入4球
最令人欣慰嘅係基奧特自阿仙奴加盟後終於入局，近4場射入3球，表現Sharp醒，值得留意係佢過往對紅軍表現特別叻，過去5次正選對利物浦射入4球，今場隨時又再數胡，何況艾華路莫拉達為咗搶回正選位，近期表現亦爭氣咗。樂比認為利物浦今場要作客贏波唔易，車仔讓平半盤絕對吸引，兩隊射手都弗，亦不妨向大盤埋手。