莫耶斯拒再悲情降班
「地獄黑仔王」莫耶斯拒絕再做悲劇主角，力抗連續兩季英超領軍降班厄運！「天才主帥」上季執教新特蘭，首嘗教波生涯降班滋味，點知今季成為韋斯咸主帥都要為護級掙扎。「錘仔幫」現時只領先尾3修頓咸3分，絕對唔穩陣，作客無心戀戰嘅李斯特城屬搶分良機，1.67倍讓球客勝值博。
（Now 622周六晚10時直播）
莫耶斯自2013年離開愛華頓轉教曼聯後，一直未好過，教紅魔唔夠1季被炒，遠走西甲教皇家蘇斯達，又係1年貨仔就執包袱，上季帶領新特蘭直情降埋班！不過莫耶斯幾個月前執掌韋斯咸帥印後，不時有神來之筆，代表作肯定係兩鬥車路士，取得1勝1和，亦打和過阿仙奴同熱刺，「耶子」嘅教練功力並非大家想像中咁不濟。
李斯特城放軟手腳
單睇韋斯咸餘下3場對手實力及狀態，今晚對手李斯特城明顯最弱，其餘兩場遇上「天才」教過嘅曼聯同愛華頓，點睇都屬硬仗。「狐狸兵團」季尾放軟手腳，近4場只有1和3負，包括主場同另1支護級球隊修咸頓打和0比0，上仗仲吞水晶宮5蛋，擺明等抖暑。值得一提莫耶斯今季中途接手韋斯咸所獲嘅第1分，就係嚟自李斯特城，今勻再遇「貴人」，信心都大啲，有分落袋唔奇。