今晚係德甲倒數第二輪，9場比賽同時開波，當中科隆對拜仁慕尼黑預期會係一場精彩入球騷，拜仁已篤定德甲6連霸，可惜啱啱喺歐聯力戰下，兩回合以3比4不敵皇家馬德里，4強止步無緣決賽，不過拜仁表現一啲都唔失禮，兩回合賽事計點數同埋門威脅比皇馬更優勝，只可惜傷兵多導致陣容不整，個別位置合作出現問題，防線犯錯較多，老帥軒歷基斯都話輸得唔抵。今晚重返德甲，雖然軒帥想畀部份主力休息，但好多正選都請纓上陣，希望大勝一吐歐聯飲恨烏氣，軒帥向來亦擅於處理危機，拜仁喺兩星期後就要踢德國盃決賽，呢段時間攞番自信好重要，球會亦將聯賽6連霸慶祝活動推遲喺德國盃決賽翌日至舉行，呢一刻佢哋仍然唔會放軟手腳。
猛將共患難 科隆主場謝幕
至於科隆雖已篤定降班，不過經過一段時間已經消化咗悲痛，近期球會不斷傳嚟好消息，兩位領袖級球星隊長祖拿斯赫達同門將漢恩都帶頭同球會共患難，放棄咗原本合約上列明若降班可以廉價800萬歐元轉會嘅條款，雙雙同科隆續長約至2023年，佢哋亦感染其他陣中主力，包括中場馬素懷斯同馬高賀查，都表明願意隨隊落德乙。科隆亦成功撬得今季德乙神奇球隊基爾嘅主帥安方下季過檔，力爭帶領球隊盡速重返德甲。今晚係科隆降班前最後一場主場比賽，又面對班霸拜仁，眾將喺冇壓力下誓要踢番場爭氣波，佢哋過去3場主場賽事分別擊敗利華古遜、賽和緬恩斯同史浩克，合共轟入5球，有一定還手能力，今晚有決心同拜仁駁火，推介中位數3.5球大盤。