愈戰愈勇唔赦噴射機
澳職總決賽今日晏晝終極一戰，本屆王者會喺紐卡素噴射機同墨爾本勝利之中產生。紐卡素噴射機雖然有主場之利，但季尾狀態同季初相比係兩回事，而下半季陣容有所變動，亦導致今日勝算大減，反而客隊墨爾本勝利愈戰愈勇，以波論波計，平手盤我今日都係力撐墨爾本勝利。
（有線603及604台周六下午5時50分直播）
紐卡素噴射機係常規賽亞軍，又抖咗一排先至喺上星期四強鬥墨爾本城，原本佢哋擊敗對手晉級係合理嘅事。之但係如果大家有收睇嗰場直播嘅話，就會見到噴射機上半場嘅表現幾咁不堪入目。如果唔係球證誤判、冇畀到墨爾本城一個12碼嘅話，「墨城」大有機會將比數拉開到2比0。去到下半場，墨爾本城教練華倫哉斯自己放棄前場壓迫戰術，任由對手壓前進攻，加上中場拉利麥基爾一個超級幸運嘅世界波，咁先至造就噴射機反勝。
噴射機今日仍然缺少防中簡達路夫斯基，加上下半季缺少進攻靈魂博納特，前場攻力起碼打個8折，佢哋今日就算主場出擊，但係讓球盤嗰度連波都唔使讓，就證明莊家都唔多睇好啦。
近10次交手7仗保不敗
反觀客隊墨爾本勝利季尾狀態理想，近5場比賽只係輸過畀常規賽冠軍FC悉尼，中前場好似前鋒貝利沙、中場巴巴路西斯，同埋今季重點外援利萊佐治個個都操到着晒火，近10次「勝利」面對噴射機都有7場保持不敗，呢個都係信心指標，所以今日平手盤，小弟一定全力支持墨爾本勝利！