英超周中補賽，車路士同熱刺兩隊Big6球隊為爭聯賽前4分途出擊。其中周四凌晨車仔將會打頭陣喺主場對哈特斯菲爾德，哈特斯上仗0比0守和曼城，呢場對住強敵車仔仲唔照辦煮碗？另外熱刺前鋒哈利卡尼近排腳風麻麻，今仗主場睇嚟都難輕取紐卡素 ，兩場細盤走唔甩。
英超嚟到尾聲，前4爭奪懸念再起，原本前4位置幾穩嘅利物浦同熱刺，近期頻頻失分，令到本來以為爭前4無望嘅車仔漁翁得利，突然睇到搶到來季歐聯席位嘅希望，尤其賽前車仔同4哥熱刺只差2分，呢場領隊干地班波今季聯賽最後一次喺主場出擊，肯定希望搶足3分。
車路士難炒哈特斯
不過車仔對手哈特斯絕對唔係嚟陪跑，為護級起碼要搶多1分，而且上仗面對超班嘅曼城都可以守和0比0，士氣信心都有齊，呢場作客唔會太進取，寧願泊大巴，大衞華拿班波近8仗聯賽開2球或以下，呢場再追中位數2.5球細盤。
（Now 623周四凌晨2時45分直播）
喜鵲夠穩頂到熱刺
同日稍後熱刺主場對紐卡素，熱刺已經唔使應付其他盃賽，近期英超表現飄忽要怪自己唔爭氣，尤其頭號射手哈利卡尼狀態明顯下滑，唔好話自己要同穆罕默德沙拿爭英超神射手，依家仲好有機會連球隊來季嘅歐聯席位都保唔住，而且對手「喜鵲」喺領隊賓尼達斯帶領下防 守穩健，近8場聯賽全開3球或以下，呢場中位數3.5球入球細絕對好路。
（Now 622周四凌晨3時直播）