護級關鍵戰盡地一煲
英超護級生死戰，史雲斯主場對修咸頓，兩隊現時同分，「天鵝」史雲斯因為淨得球不及對手，暫時排尾3，跌入降班區，如果今場贏唔到「聖人」修咸頓，就好大機會降班，勢必盡地一煲搶3分。修咸頓由於最後1仗要鬥冠軍曼城，冇把握攞分，亦要趁今場一舉擊敗史雲斯，以絕後患。預料雙方都會主攻，博中位數2.5球嘅入球大。
（Now 621周三凌晨2時45分直播）
史雲斯本來護級形勢唔算差，但近6場聯賽只取得2和4負，搞到情況急轉直下。不過，要留意史雲斯近6場對手包括曼聯、曼城、車路士，接連失分情有可原。今場遇上護級競爭對手修咸頓，點都要谷埋最後一口氣，全力爭勝，否則好可能下季英冠見。史雲斯中前場有加納國腳阿休兄弟，有本錢主攻，同埋佢哋今季曾於主場擊敗利物浦、阿仙奴，今場隨時又有神來之筆大反彈。
修咸頓中堅吉田麻也停賽
修咸頓近3場聯賽取得1勝2和，其中上仗作客對愛華頓，修咸頓表現唔錯，理應全取3分，但比賽末段有後衞吉田麻也被逐，最後更於補時失守，被逼和1比1，的確唔抵。不過亦顯示修咸頓護級鬥心十足，而且已谷起狀態，今場造訪史雲斯雖有吉田麻也停賽，無懼同對手駁火。