福仔馬迪爾照完肺必搏
英超周五凌晨補賽，「錘仔幫」韋斯咸主場迎戰「2哥」曼聯。「紅魔」前場兩位年輕球員拉舒福特同安東尼馬迪爾上仗冇貨交畀人閙爆，呢場肯定會搏盡踢爭氣波，另外韋斯咸護級成功，冇晒心理包袱肯定踢得特別醒神，尤其錘仔幫以往對親Big6球隊都演慣大騷，今場對攻戰走唔甩，大細中位數2.5球，1.85倍入球大捧得過。
（Now 621周五凌晨2時45分直播）
紅魔主力前鋒盧卡古早前受傷要長抖，領隊莫連奴近排就畀足機會兩位小將拉舒福特同安東尼馬迪爾擔正，不過佢兩個冇乜料到，尤其上仗輸畀白禮頓一役，「福仔」一味扭來扭去，完全唔識配合；安東尼馬迪爾喺場上又好似遊魂一樣，激到寸王生蝦咁跳，賽後忍唔住暗寸部分球員嘅表現。不過正印前鋒盧卡古繼續倦勤，呢兩位前鋒為爭上位，而且仲要爭入世界盃國家隊大軍名單，點會放棄表現自己嘅好機會呢？今場二人為一吐烏氣，肯定會落力爭取入波。
韋斯咸冇包袱鬥攻
另一邊廂，錘仔幫上仗2比0擊敗李斯特城攞夠分護級，總算保住來季英超席位；今場冇壓力之下，班波肯定踢得更放，尤其今季聯賽攻入10球並交出5次助攻嘅前鋒阿拿奧杜域，已經多次證明自己實力超班，上輪就助攻隊友祖奧馬里奧入波，狀態大勇，搭住今場倒戈嘅前紅魔射手查維亞靴南迪斯，韋斯咸要入波絕對冇難度。加上錘仔幫近4仗聯賽對Big 6球隊，就有3次開3球或以上，鬥攻格局一於捧入球大。