首回合鬥攻格局
周六凌晨展開嘅英冠升班附加賽4強首回合，由「綿羊」打比郡主場硬撼富咸。眾所周知升上英超代表「錢」途無限，今晚兩軍必搏甩髀。打比郡今季踢法開放，加上有聯賽射手王馬迪維達坐鎮，趁主場猛攻；客軍富咸火力強勁，聯賽入波僅次於榜首狼隊，1.92倍大盤咪走寶。
（周六凌晨2時45分開賽）
今季大部分時間演出強勁嘅富咸，曾創下聯賽23輪不敗走勢，可惜佢哋「輸收尾」，喺英冠最後一輪爆冷以1比3輸畀下游分子伯明翰，同直接升班席位失諸交臂，最終第3名衝線，繼上季後再次捲入附加賽亂戰。好在球隊實力唔曳，尤其季中由英超紐卡素借番嚟嘅前鋒阿歷山大米祖域，只花半季就入足12粒，仲成為球隊頭號射手，加埋剛攞咗英冠最佳球員獎嘅超新星賴恩施斯隆幫手，富咸首回合作客，都有力威脅打比郡防線。
綿羊近3次升班附主場全開大
過完聖誕之後狀態明顯下滑嘅打比郡，好彩臨尾爭氣，喺最後一輪大炒班士利4個1皮，踢對手落英甲之餘，仲確保聯賽第6位嘅附加賽資格。「綿羊」表現飄忽同踢法重攻輕守有好大關係，箭頭馬迪維達以21球成為今季英冠神射手，但佢哋亦係英冠前6位中失波最多嘅一隊，有前冇後下，近7仗主場總入球全開3球或以上。就算單計英冠升班附加賽，佢哋3次喺地頭出擊亦悉數開大，證明嚟到咁緊張關頭，打比郡都唔會刻意求守，今晚鬥攻格局，入波唔慌少，大盤屬好路之選。