和波都穩奪季軍
法乙常規賽今晚煞科，排名頭兩位球隊蘭斯、尼姆已取得直接升班資格，餘下1個升班附加賽資格，將由第3至第5位球隊爭奪。阿些斯奧只要主場打和尼奧特，就可以穩佔第3位，取得附加賽「準決賽」席位，以阿些斯奧主場7連勝強勢，相信可順利完成任務，只不過未必會大炒對手，主W熱爆，寧願博入球細。
（周六凌晨2時45分開賽）
法乙升班制度比較特別，聯賽頭兩位球隊直接升班，第4位同第5位球隊需要交鋒，先踢1場「預賽」，勝方再同第3位球隊對壘，勝出者最後同法甲第18位球隊，爭奪1個法甲席位，簡直係要過五關斬六將。
因此，阿些斯奧點都希望保住第3位，起碼唔使踢預賽，減低出局風險。阿些斯奧現時領先第4位比斯特3分，所以今場和波都搞掂，應該會以穩陣行先。事實上，阿些斯奧近6場比賽總入球都係2球或以下，今場隨時又僅僅熟，最好揀入球細。
勒哈弗爾當弗吼「讓主」
至於比斯特近6場取得5勝1和，今場作客對踢風流波嘅查多魯，有力再下一城保住第4位，主勝抵玩。第5位勒哈弗爾取得4連勝，今仗主場可望一鼓作氣，重創已篤定降班嘅杜亞斯。