德甲今晚煞科，雖然拜仁慕尼黑已經提早奪冠，但前4爭奪依然刺激，目前同得52分嘅賀芬咸同利華古遜喺最後一戰都主場出擊，勢必全力向歐聯入場券展開衝刺。
利華古遜目前排第5，同第4嘅賀芬咸同分，但得失球差落後3球，今晚主場要贏之餘仲想大勝，遇上無欲無求嘅漢諾威睇落大勝機會唔低，不過利華近3場聯賽1和2負仲要1球都入唔到，狀態明顯下滑，今場仲有首席射手禾蘭停賽，前線要靠艾拿利奧同老將傑斯寧施高襲。不過將於下季轉會史浩克嘅漢諾威中堅沙利夫辛尼出名係「空中霸王」，今季空中爭頂頂贏220次，排德甲球員第1名，利華嘅空襲未必攞到着數。
傑斯寧告別利華贏兩粒？
效力利華古遜已經12年嘅34歲老將傑斯寧，已經決定踢埋今仗掛靴，相信利華點都會畀啲時間佢上陣作告別戰，不過佢今季只曾後備上陣7次，未交出任何建樹，好在球隊傷兵問題已有改善，主力賓達兄弟同莊拿芬泰希都可以復出，防線穩陣好多。漢諾威已經上岸，但上輪大破哈化柏林所見，防線依然保持良好紀律，佢哋實力雖然較弱，卻勝在戰意十足絕少大敗，球隊踏入今年16場聯賽雖然輸咗半數，但除咗對大超班嘅拜仁外，其餘7場敗仗都係1球起兩球止，利華今晚有主場都唔會贏得好多，「讓球主客和」利華讓到兩球嫌太辣，中位數3.5球嘅大盤又熱到得1.58倍冇分頭，黑柴建議以小博大，敲有4.25倍嘅「讓球和」。