西法雙雄決戰里昂
今屆歐霸決賽周四凌晨爆發，由法甲馬賽喺中立場法國里昂決戰西甲勁旅馬德里體育會。馬賽雖有半個主場之利，但今晚想偷雞並唔易，皆因西班牙球隊近年「統治」咗歐霸，近8屆就有5次由西甲兵封王，加上馬體會嘅歐戰經驗極度豐富，今場有望凱旋而歸，熱捧1.59倍客勝！
（Now 633周四凌晨2時45分直播）
睇番近8屆歐霸決賽，除葡超波圖曾喺10/11奪冠外，餘下7次由西甲同英超球隊攤分，當中西甲兵更5度封王，除咗西維爾連續3屆奪冠之外，其餘兩次冠軍都屬於馬體會，11/12封王嗰屆，就係由現任教頭施蒙尼所領軍。
「床單兵團」兩奪冠經驗贏晒
近年喺歐聯屢有好表現嘅馬體會，今屆「降呢」半途轉戰歐霸，論經驗同實力都可謂綽綽有餘，況且西甲球隊喺決賽極具保證，計埋前身歐洲足協盃在內，西甲兵近8次入決賽全部順利捧盃，當中法定時間取得5勝3和佳績，「床單兵團」今仗更可夫添出擊，無論人腳、往績同經驗都秤先啲，贏波封王問題不大。
法甲「4哥」馬賽事隔多年殺入決賽，晉級路途上先後KO布拉加、畢爾包、RB萊比錫同薩爾斯堡。相比起馬體會，馬賽所淘汰嘅對手實力雖未見標青，但佢哋8場淘汰賽當中都輸咗3場，尤其4強次回合對薩爾斯堡，若然唔係加時有路蘭度入波奠勝，過唔過到關都成問題，可見馬賽實力未達頂級，今場難同超班嘅馬體會周旋，客勝屬穩陣之選。