英超大結局前4之爭最矚目
唔經唔覺英超又嚟到煞科，今晚10點會同時間進行10場賽事，最矚目相信係英超前4之爭，第5位嘅車路士作客紐卡素，若贏波仲有價講，但觀乎車仔上周中「自殺式」大輪換炒「車」收場，睇嚟領隊干地已有心理準備走人，今晚作客凶地聖占士公園讓半一，樂比支持下盤。
（Now 624周日晚10時直播）
尾3史雲斯護級要靠奇迹
比起往年，今季英超煞科日可謂較為平淡，因為形勢早已呼之欲出，曼城提早封王兼打破英超得分及入球紀錄，最後一仗作客修咸頓可謂半例行公事，因為尾4嘅修咸頓領先尾3嘅史雲斯3分兼有9個得失球差優勢，除非史雲斯今晚戲劇性大勝而修咸頓又大敗，否則史雲斯就要陪埋史篤城、西布朗齊齊降落英冠，喺呢個情況下修咸頓必排出鐵桶陣，細盤係唔錯選擇。
今晚唯一較有懸念係前4之爭，第4嘅利物浦領先車仔兩分兼有巨大得失球差優勢，今晚只要主場和到白禮頓就水到渠成，車仔季尾本來狀態回勇，上周擊敗利物浦1比0，打出4連勝氣勢，但周中對哈特斯菲爾德竟然收起6名正選，包括狀態大勇嘅基奧特同絕對主力夏薩特，此舉令大部分人摸不着頭腦，更有陰謀論指干地知道自己就快被炒而鬥氣。
作客聖占士公園例冇運行
老實講如果車仔周中贏波嘅話，以其氣勢今晚再下一城絕無問題，但依家搶四形勢極為被動，加上球隊嘅勝利氣氛已被打破，情況完全唔同晒，因為車仔近年去親聖占士公園都冇運行，近6次僅贏過1次，何況紐卡素領隊賓尼迪斯對車仔相當熟悉，當年又慘食無情雞，今場絕對想證明自己能力落井下石。
另一邊廂利物浦只要1分就任務達成，由於有歐聯決賽後顧，今場目標都係盡量唔好增添傷兵，今晚主場對白禮頓讓兩球真係多咗，下盤同細盤都可以支持。