德國盃決賽今晚上演，拜仁慕尼黑同法蘭克福喺中立場柏林奧林匹克體育場爭霸，班霸拜仁牌面當然贏條街，不過法蘭克福今季屢遭拜仁欺凌，令原本十分美好嘅球季變成隨時一無所有，今仗遇仇人就算唔夠打都搏甩髀鍊到盡，誓要爆冷搶盃兼搶下屆歐霸入場券，預期會係一場對攻好戲，推介2.02倍嘅中位數3/3.5球大盤。
（無綫翡翠台、myTV SUPER94周日凌晨2時直播）
法蘭克福喺尼高高華帶領下，踢出近年最好一季，今年二月底更一度高踞聯賽榜三甲，爭下屆歐戰入場券原本成竹在胸，點知去到4月13日噩耗傳來，拜仁喺未有知會法蘭克福嘅情況下，單方面宣布會喺今夏買斷尼高高華合約，呢位主帥下季將會接替軒歷基斯執教拜仁，法蘭克福體育總監波碧鬧爆拜仁喺呢個時候宣布消息打擊士氣，結果法蘭克福最後5場聯賽輸咗4場，排名跌到第7位。
捧唔到盃今季將一無所有
德甲前4名可以參戰歐聯，第5同第6名參戰歐霸盃，至於仲有一個歐霸盃名額，將會係德國盃冠軍，如德國盃冠軍球隊已獲歐戰入場券，則由聯賽第7名代替。法蘭克福由於殺入德國盃決賽，佢哋只要保住第7，本來仲可以穩得歐霸盃參賽權，點知拜仁煞科日再玩嘢，竟然喺主場捧盃大日子以1比4慘敗畀原本第8位嘅史特加，令史特加最終以兩分差距反超法蘭克福搶走第7位，換言之法蘭克福今晚必須捧盃至可以保住歐霸資格，教練尼高高華今晚決定以3412進取陣式同強敵駁火，希望創造奇迹。
拜仁德甲6連霸，今晚向雙料冠軍進發，並送別73歲傳奇教練軒歷基斯，今仗雖然有謝路美保定、維達爾、洛賓同京士利高文等主力養傷，牌面仍然遠勝對手，軒帥亦計劃排出433陣式主攻，兩軍上月底喺德甲交手，拜仁主場贏4比1，既然法蘭克福作客安聯都入到波，今晚喺中立場豁出去一拚，好大機會同拜仁再演入球騷。