曾幾何時，英格蘭足總盃嘅重要性，絕對唔亞於世界盃或者歐聯。由於經常有電視直播，當年唔少香港以至亞洲地區嘅球迷，都好關注喺溫布萊上演嘅決賽，但過去幾年有唔少頂級球隊，為集中火力應付歐聯等賽事，變得忽視咗足總盃。
不過俗語都有話「瘦田冇人耕，耕開有人爭」，今屆決賽分子車路士同曼聯喺各項戰線表現欠佳，為免四大皆空，「紅藍」兩軍都肯定會視足總盃為「救命稻草」。
車路士領隊干地雖然季尾好大機會離隊，球隊前途未卜，但唔好以為班球員會因此而放棄，皆因為咗個人前途着想，佢哋都希望交出好表現，況且干地就算即將出走，都想捧番個盃證明自己仲有競爭力。曼聯季初及季中重金增兵，獲盧卡古及阿歷斯山齊士等強援加盟，牌面上人才濟濟，可惜奉行保守戰術嘅領隊莫連奴，未能激發球隊潛力，令球隊表現畀哥迪奧拿帶領嘅曼城，以至高普領軍嘅利物浦所蓋過。今晚兩隊領隊戰術都以防守為主，入球未必會多之餘，更有可能會將比賽拖入加時階段。
馬體會封王＝「No Brainer」
最後Peter想講吓周四凌晨嘅歐霸決賽，我賽前就睇好馬德里體育會可以笑到最後捧盃，其實呢個預測跟本就是「No Brainer」，意思即係諗都唔使諗係人都知。皆因馬體會無論喺主帥級數及球隊攻擊能力等方面，都遠勝對手馬賽。好多人賽前話馬賽有半個主場優勢，然而里昂和馬賽講到尾都唔係同一個地方，加上馬賽實力明顯弱得多，所以話馬體會封王完全唔意外！
金句：褪色咗的英格蘭傳統盃、本屆幸得回金漆紅藍招牌。