周一早上美職阿King梗係有心水，重心就係阿特蘭大聯主場火併紐約紅牛！「阿聯」今季前場一班進攻組合弗到爆，火力強勁，尤其主場多波入，呢場面對攻擊能力有番咁上下嘅紅牛，隨時上演對攻戰，中位數3.5球入球大捧得過。
（無綫 myTV SUPER 303台周一早上7時直播）
上季先登陸美職嘅阿特蘭大聯，踏入聯賽征戰第2年，今季可以話係愈戰愈強，穩佔聯賽前列位置，家陣仲係東岸1哥。佢哋之所以咁強勢，絕對係靠一班南美攻擊好手嘅弗爆表現，其中前鋒祖斯夫馬天尼斯開咧至今入咗8球，喺射手榜名列前茅，佢哋近6仗聯賽主場就有5次開4球或以上，可見入球能力有保證。對手紐約紅牛都唔輸蝕，近3仗聯賽作客攻入8球，可見呢班波客場都唔會留手，呢場隨時又大把波入。
火燄「細」守戴拿模
跟住再搭多場芝加哥火燄主場對侯斯頓戴拿模，火燄喺自己地頭作風以守為主，近4仗主場全開3球或以下，呢場料會繼續靠防守搵食。最後有巴甲帕拉拿主場硬撼甘美奧，甘美奧快翼阿里遜雖然整親倦勤，不過整體實力遠勝帕拉拿，客勝冇走雞。