搶歐聯入場券神鋒對決
意甲今晚煞科上演歐聯入場券爭奪戰，第4位拉素主場對第5位國際米蘭。兩隊只能活一隊，國米落後對手3分，必須贏波，先至可憑較佳對賽成績，壓過拉素，獲得下屆歐聯參賽資格，必定豁出去一搏。拉素有射手恩莫比尼傷愈復出，佢亦要同國米前鋒莫路伊卡迪爭奪神射手殊榮，一場大火併在所難免，首選入球大。
（無綫myTV SUPER 302台周一凌晨2時45分直播）
根據意甲賽制，同分先計對賽成績，拉素同國際米蘭首循環打和0比0，換言之國米今場只要贏波追至同分，就可憑較佳對賽成績，升上第4位。因此「藍黑兵團」想踢下屆歐聯，今場非勝不可，惟有主攻爭取擊敗拉素。事實上，國米近期攻力有明顯改善，近5仗合共轟入13球，但主攻嘅時候，防線難免空虛，造成近5場聯賽總入球都達3球或以上。
至於拉素打和都可以取得歐聯入場券，球隊狀態不俗，近10場聯賽不敗，取得5勝5和。當中不乏大比數賽果，包括作客以4比3擊敗前列球隊費倫天拿，今場有地利，加上恩莫比尼復出，絕對唔係坐以待斃，有力喺國米身上取得入球。
神射手之爭只差一球
今場除咗係歐聯入場券之爭外，亦係「神射手決賽」，恩莫比尼現時以29球領先射手榜，莫路伊卡迪以28球緊隨其後。兩位神鋒為公為私，都要使出渾身解數數胡，有利製造入球。