後防殘缺 前線爭氣
周一凌晨西甲多場煞科戰上演，其中巴塞隆拿主場對皇家蘇斯達。一哥巴塞上輪意外吞下今季聯賽首場敗仗，可見就算前線攻力再強，都彌補唔到防線兵源短缺嘅問題，煞科戰對住質素不俗嘅皇蘇，隨時再輸多幾粒，呢場等睇入球騷都似，中位數4.5球入球大照捧。
（Now 632周一凌晨2時45分直播）
今季成功重奪聯賽冠軍嘅巴塞，本來有望以不敗姿態完成今季賽事，不過事與願違，上仗爆大冷以4比5輸畀下游分子利雲特，守咗成季嘅聯賽不敗金身就咁冇咗。講到尾，同巴塞後防積弱有好大關係，除咗養緊傷嘅烏姆迪迪同停賽嘅沙治羅拔圖之外，上場連後衞華美倫都傷埋，加上新兵耶利文拿表現貨不對辦，防線實力大減。好彩隊中一班攻擊手夠爭氣，近5仗狂轟20球，其中4次都開5球或以上，呢場面對狀態有起色嘅皇蘇，兩軍隨時上演對攻戰，中位數4.5球入球大諗得過。
馬體會鬥伊巴吼細盤
而較早時間開波嘅，仲有馬德里體育會主場迎戰伊巴。馬體會啱啱喺歐霸捧盃，加上已經鎖定聯賽前3位置，今季任務幾乎搞掂晒，周中踢完決賽班波攰攰哋，煞科戰未必會盡全力。況且馬體會踢法不嬲以穩守為主，近4仗聯賽就全開2球或以下。呢場睇怕實力欠奉嘅伊巴，唔好話撕破密集防線，畀馬體會搓順起嚟控制住大局，隨時連波皮都掂唔到，中位數2.5球入球細唔好錯過。
（Now 632周一凌晨零時30分直播）